Kasilde Aginaga Barinagarrementeria

Okerra kalean jaio zen 1916. urtean. Gurasoak ere markinarrak zituen: aita etxe azpian tailerra zuen zapatari ezaguna eta ama Urberuaga auzoko Belaustegi baserrikoa. 8 urtegaz joan zen eskolara, baina 11 urterekin "Erromonanekue" janari-dendan hasi zen lanean eta bi urtez egon zen bertan. Primo de Riveraren garaian, 7 urte zituela, galarazita zeuden mezuak, ezkutuan pasatzen zituen. Gerra aurretik hasi zen Esperantza lantegian lanean, eta 43 urtez egon zen bertan, azken 25 urteak zentralitan. Amak 'Euzkadi' egunkaria saltzen zuen. Aita kartzelan izan zuen eta zekien guztia kontatzeko biluzarazi egin zutela kontatu digu Kasildek; ondorio psikologiko latzak utzi zizkion eta handik gutxira hil zen. Familia abertzalekoa izaki, batzokiko Emakumeen Batzako kidea izan zen eta 1938. urtean Bilboko Orue txaleteko kartzelan hartu zuten preso. Epaimahai militar batek epaitu eta urte bete eta hilabete bateko zigorra ezarri zioten; azkenean, 6 hilabete eta egun batekoa bete zuen. Mutil-laguna ere gerratearen ondorioz galdu zuen, gerran zauritu eta gerraostean, ezkontzear zeudela, hil baitzen zaurien ondorioz. Gerra Zibilak erditik ebaki zuen emakumea dela dio.