Miren Vallejo Arriaga

Errosario kaleko Vallejonekua etxean jaioa. Aita, sestaoarra, hiru urterekin etorri zen Elgoibarrera; ama elgoibartarra zen. Lau anai-arrebatatik zaharrena. Aitak forjan lan egiten zuen eta amak Peñalba abarketa-lantegirako abarketak josten zituen etxean, Mirenek lagunduta. Hiru urterekin eskola txikian hasi zen ikasten, euskaraz; sei urterekin publikoetara pasatu zen eta erdaraz jaso zituen eskolak. Hamahiru urterekin gerra hastearekin batera, eskolok bukatu ziren. Hamabost urterekin Valenciaga tailerrean hasi zen lanean; gero “Alcorta y Cía”n jardun zuen ezkondu zen arte. Pako Juaristi “Txitxarrokua”rekin ezkondu zen Txitxarrokua etxera. Antzezlanak egiten zituzten gerra aurretik Batzokian, Anjel `Mutriku´ eta Antonio Manterolaren zuzendaritzapean. Urte askoan jarraitu zuen antzerkia egiten eta Euskal Eztei Zaharrak ere antzeztu izan zituen senarrarekin batera. Dantza solte txapelketetan ere ibiltzen ziren. Euskara eskolak ematen ere aritu izan zen. Elkarrizketetako batean Mirenen koinatua Bitor Arrieta ere egon zen. Kantu eta jolasak jasotzeko egin genion elkarrizketan eta Arrieta anaiek Elgoibarko hainbat kontu jasotzeko egindako elkarrizketan ere Maite ahizparekin batera azaltzen da.