Inaxita Arozena Izeta

Zestoako Gexala baserrian jaio zen 1919ko ekainaren 15ean. Gurasoek Inazio eta Josefa zuten izena, eta lau ahizpatan gazteena zen bera. Aitaren omenez jarri zioten Inaxi izena; izan ere, ama zortzi hilabeteko esperoan zegoela alargundu zen. Alargunduta, lau alabekin Azpeitira bizitzera etorri, eta ile-apaindegia zabaldu zuen Inaxitaren amak. Miserikordian ibili zen eskolan 11 urtera arte, eta, gero, alpargatei zintak josten aritu zen lanean. 16 urterako, amari erreleboa hartu eta ile-apaintzaile lanetan aritu zen, erretiroa hartu zuen arte. 29 urte zituela Migel Bereziartuarekin ezkondu eta zortzi seme-alaba izan zituen (sei alaba eta bi seme). Elkarrizketan, bere alaba Mirari Bereziartuak ere parte hartzen du.